السلام عليكم ورحمة الله وبركاته يا يخوان أقول هالكلام من باب النصيحة والخوف عليكم 🤍بالنسبة لبيع حسابات ببجي بحراج، انتبهوا انتباه ، ترى فيه نصابين كثير يسرقون الحسابات بطريقة ذكية. الطريقة غالبًا تصير كذا :تنزل إعلانك، ويجيك واحد يسوم الحساب بسعر عالي مره يخليك تطمع وتتحمس للبيع، بعدها يسألك وين موقعك. إذا قلت الرياض مثلًا، قالك أنا بالأحساء أو جدة أو مدينة بعيدة، والزبدة يعطيك موقع يبعد عنك أقل شيء 10 ساعات. بعدها يبدأ يزود بالسعر شوي شوي لين يضمن إنك خلاص تبي تبيع بأي طريقة، ثم يدخل عليك بسوالف “أنا رجال ومو نصاب” أو “خلنا نحول الحين” أو يرسل لك روابط ومواقع وهمية. و كثير منهم بنات او رجال يحطون صور بنات عشان يكسبون الثقة، وبعضهم يدخل بحساب بنت ويقعد يسولف معك طبيعي لين يطيحك بالكلام، فانتبهوا لا أحد يضحك عليكم. و انتبهو من المتاجر وأهم شيء: لا تعطي كود التحقق لأي أحد مهما صار. لا تدخل أي رابط يرسله لك. لا تسجل دخولك بأي موقع غير رسمي. لا تسلم الحساب لين تضمن حقك. والبيع يكون يد بيد فقط، غير كذا لا تبيع ولا تشتري. وإذا لا قدر الله انسرق حسابك، لا تحذف اللعبة أبد، لأن حذفها يصعب استرجاع الحساب ويمكن يضيع عليك. ترى حسابك فيه تعب ووقت ويمكن فلوس كثير، فلا يروح عليك بسبب استعجال أو ثقة زايدة. انشروا الكلام يمكن واحد ينتبه قبل لا ينسرق حسابه 🤍