#جدري_الكناري🔥🔥🔥🔥🔥
موضوع مهم بهالوقت من السنة وماكنت حابب اكتب عنو لانو بصراحة الشرح طويل ومعقد شوي رح حاول اختصر قدر الامكان
متل ماسبق وحكيت عن جماعة البصل والتوم وخل التفاح والحلبة والسبع بهارات بالمشربية واثبتلن انو كلو حكي فاضي وضرر لامعاء الطير اكتر من اي فائدة اليوم في واحد من جماعة التوم والخل والسبع بهارات طارش الدنيا بوصفة لعلاج جدري الكنار وجايب عصفور وعم يعالجو والهدف كلو لم لايكات وحصد متابعات عحساب عذابك كمربي والادها من هيك حاطط الصورة باليوم الاول وحاطط صورة بعد كم يوم على الرغم واضح انو الصورة بعد العلاج هي صورة الطير اول يوم بالاصابة وصورة الطائر قبل العلاج ولي اصبعو مدماية هي صورتو للطير بعد العلاج وماستفاد شي طبعا بس كيف بدنا نحصد لايكات ومتابعين هيك المهم رح احكي عن تجربتي مع جدري الكناري وطبعا بحكم صداقتي مع كتير اطباء بيطريين ولي طبعا من الاول حطوني بصورة فداحة المرض وصعوبة الشفاء يلي بدي احكي عنو انو المرض فايروسي يعني بفوت جوا الخلايا السليمة وبموه حالو وبفوت بفترة حضانة لحد هون تمام ؟
طيب كيف بدي عالج فايروس انا بالتوم والخل وبأي دواء بيطري او بشري رح جاوبك باختصار طالما فايروس معناها متل لكريب مابطيب ليصير عند الجسم مناعة وتنكشف نقاط ضعف الفايروس ويقدر الجسم يدمر الفايروس يعني الادوية شو وضعا الادوية بس لنخفف معانات الطير ونحاول نرفع مناعتو لحتى يقاوم ومايفرط رغم هالشي نسبة الشفاء ضعيفة يعني من 43 طير عاش 6 طيور وعاشو بحالات فقد عين او اصابع يعني انعطبو طيب شو الحل الحل هو اللقاح متل لقاح الشلل عند الاطفال في لقاح للجدري بينعطى بالجناح وعنا لسا مو موجود واذا انوجد فهو مكلف جدا هي عطيتكن ياها من الاخر طيب انا شو عملت معقول قصرت بشي رح حطلكن شو استعملنا دهنات لمكان الاصابة من دهنات لدغ الحشرات لليود للتوم للخل للكلور حتى استعملنا ماء الاوكسجين يلي بيستعملو دكتور الاسنان ليموت عصب السن ومية البحر وحطينا نحاتة بارض القفص ومراهم تاع البثور والتالول حتى استعملت الجنتومايسين والوليفيرا هيييك لتوصل للطيون لنوقف النزف لانو وقت تنخدش الحبة لبرجل الطير القفص كلو حرفيا بصير دم كأنك دابح الطير طبعا بالمشربية كلشي بيخطر ببالك من رافعات المناعة لمضادات الالتهاب للمطهرات المعوية للفيتمينات وكلو من احسن الماركات لهون تمام ماستفدنا شي النتيجة موت زعاف
طيب شو السبب : السبب لدغة برغشة حاملة للمرض شو يعني هالحكي يعني البرغشة اذا مو حاملة المرض بتظهر حبة مكان اللدغة وبتستجيب للعلاج بسهولة وبتختفي وهاد لصار مع بعض المربين وظنو انن عالجو الجدري وقهروها بس بالحقيقة مو كل لدغة للبرغشة بتعني اصابة جدري ممكن البرغشة ماحاملة المرض وهالشي بفسر كيف استطاع بعض المربين علاج الجدري طيب كيف بتتحول لدغة برغشة لكابوس اذا البرغشة حاملة للفايروس الطير انصاب حتما طيب كيف انتشر المرض من اديك ومن ازدحام الطيور بنفس القفص والتشارك بالمشرب والمأكل والمجثم واهم شي الفاش يلي بينشرلك المرض وبحولو لوباء بكل الغرفة لهيك لاتشتري قفص مستعمل بلا ماتعقمو بكلور بتركيز عالي ولاتدخل طير جديد عغرفتك بالصيف لازم تحجرو بعيد عن غرفتك فترة اقل شي 15 يوم ولما بترجع من سوق الطيور لاتدخل الطير يلي مانباع معك عالغرفة مباشرة لازم حجر لان يلي مسكو ليفحصو بالسوق اكيد ماسك 100 طير غيرو وممكن واحد منن مصاب الطير المصاب بالجدري حتى لو ببدايتها بترتفع حرارتو وبيفتح تمو مع انو بالظل وخامل عالمجثم لاتفكر الطير مشوب هي علامة ولازم تعطيه خافض حرارة وهاد كان من ضمن الكورس العلاجي
