السلام عليكم
أخواني الكرام نظرا لوجود لبس وخلط كبير وربما غش في بعض اعلانات الاسكاليد الجديد 2021 وأعلى وعرض بعض المعلنين نوع البريميوم على أنه بلاتينيوم لأن معظم الناس مع الأسف مايفرق بين النوعين وممكن الشخص يشتري البريميوم على أنه بلاتينيوم حسب الإعلان المدلس مع الأسف !!
للتوضيح أهم وأول شغلتين تعرف منها بشكل سريع وقاطع اذا كانت السيارة بلاتينيوم أو الفئة الأقل هي :
1- سقف البلاتينيوم فقط هو اللي يكون شامواه (مخمل) وباقي الفئات تكون قماش عادي .
2- مساج للمراتب الأمامية يكون فقط بالبلاتينيوم ولا يأتي على باقي الفئات وتلاقي زر المساج دائري داخل برواز نيكل دائري على جانب المرتبة للسائق والراكب الأمامي فقط (مرفق صور للتوضيح) .
وباقي الفروقات كالتالي :
3- الوان البلاتينيوم الداخلية تجي 3 ألوان وتختلف تماما عن الفئة الأقل وماتجي الا على البلاتينيوم فقط (اللون الأول يكون المراتب مع الطبلون وكامل الابواب لون واحد لون بني غامق جدا (عودي) غامق وليس جملي لأن الجملي مانزل على البلاتينيوم اطلاقا - والثاني مراتب بيج فاتح (أبيض) ولون الطبلون والسقف يكون رمادي (مايجي مراتب ابيض والطبلون أسود على البلاتينيوم) - الثالث يكون داخلي أسود بالكامل مع تطريز حواف المراتب بالأبيض وغالبا هذا يجي على الاستخدام او المواصفات الامريكي ويجي كمان اللون الاسود الداخلي بالكامل على البريميوم .
4- وجود سماعات بداية الأكتاف الأمامية الداخلية للسيارة فوق الطبلون تقريبا (موضح بالصور) وكمان البلاتينيوم يجي سماعات صغيرة نيكل بالسقف فوق رأس كل راكب أمامي وخلفي (غير السماعات اللي تجي بتكاية الراس الأمامية) لأن البلاتينيوم يجي 36 سماعة والعادي يكون 19 سماعة فقط والسماعات اللي بتكايات الرأس الأمامية تجي بكل الفئات .
5- نقشة مراتب البريميوم تختلف تماما عن نقشة البلاتينيوم .
سبب تحديث الإعلان بسبب كثرة الاستفسارت على الخاص ولأنه اصبح تجي سيارات اسكاليد خليجي بريميوم تكون فيها نفس سماعات البلاتيننيوم 36 سماعة (بالسقف والأكتاف الأمامية وعلى الطبلون الأمامي ) رغم أن السيارة بريميوم وليست بلاتينيوم كمواصفات أضافية طلبية وعشان تتأكد وتكون مرتاح ولا ينصبون عليك تأكد من أهم نفطتين وهي وجود زر المساج والسقف المخمل بالسيارة واللون الداخلي ووقتها تعرف فقط وتتأكد أن السيارة بلاتنينوم أو بريميوم .
وللتوضيح الفروقات السابقة هي نفسها تجي على السبورت البلاتينيوم او البلاتينيوم العادي وما تجي بالفئة الاقل سواء سبورت او عادي .
أخيرا أذا كانت الداخلية المراتب جملي والطبلون أسود المرفقة صورتها بالاعلان والمنتشرة بالموقع فهي للفئة البريميوم فقط وما نزل على البلاتينيوم إطلاقا وأيضا إذا كانت المراتب بيج فاتح (أبيض) والطبلون والابواب لون أسود فهي بريميوم وليست بلاتينيوم وحتى لوكانت 36 سماعة , وممكن ترجعون للاعلانات بالموقع وللنت وتلاحظون الفروقات الموضحة وتوضح لكم الصورة بشكل أوضح .
أرجو أن أكون وضحت بشكل جيد واعتذر عن عدم استطاعتي الرد على الجميع بالخاص والله الموفق
